Skip to main content

বিশ্বকোষ কেনেকৈ লিখিব পাৰোঁ?

পঢ়ি অহা বিদ্যালয়খনৰ কথা ইণ্টাৰনেটত প্ৰতিষ্ঠা কৰিবলৈ  মন যোৱাৰ সময়ৰ কথা। মহকুমাটোৰ কিছুসংখ্যক মানুহৰ বাদে তেতিয়ালৈকে আমাৰ বিদ্যালয়খন ইমান বেছি আলোচনাৰ বিষয় হোৱা নাছিল তেতিয়ালৈকে-- যেতিয়া হাইস্কুল শিক্ষান্ত পৰীক্ষাত দুজনকৈ ছাত্ৰই অসমৰ ভিতৰত স্থান লাভ কৰি আমাৰ অঞ্চলটোৰ শিক্ষাৰ জগতখনত তোলপাৰ লগাবলৈ সক্ষম হ'ল। ব্যক্তিগত খণ্ডৰ অসমীয়া মাধ্যমৰ বিদ্যালয় হেতুকে বিদ্যালয়ৰ বাৰ্ষিক পৰীক্ষাৰ পাছত নতুন শিক্ষা বৰ্ষৰ বাবে নামভৰ্তিৰ দিনাৰ আগলৈকে শিক্ষকসকল আৰু কৰ্মচাৰীবৃন্দৰ দ্বাৰা নিজেই চাৰিআলিৰ কোনো এক চুকত, নতুবা ৰাজহুৱা পৰিবহণ আস্থানত থকা ডাঙৰ গছজোপাৰ দুডাল ডালত ওলোমাই নামভৰ্তিৰ জাননী দি বিদ্যালয়খনৰ কথা ৰাইজক জনাবলগীয়া এক অৱস্থাৰ পৰা শিক্ষানুষ্ঠানটোৱে অঞ্চলটোৰ শিক্ষাৰ ক্ষেত্ৰত ইতিহাস ভংগকাৰী নিজা এক গৰিমা অৰ্জন কৰাৰ অৱস্থাটোলৈকে সকলোকে জনোৱাৰ প্ৰয়াসেৰে স্কুলৰ ৱেবছাইট এটা সাজি উলিওৱা হ'ল।

বৰ্তমানে যিকোনো শেহতীয়া তথ্যৰ বাবে সকলোৱে পোনছাটেই ইণ্টাৰনেটৰ সহায় লয়।  তথ্যৰ অলেখ ভাণ্ডাৰ দ্ৰুতগতিৰে সহজলভ্য হৈ পৰা বাবে সকলো স্তৰৰ মাজতে ই জনপ্ৰিয় হৈ পৰিছে। আৰু ঠিক একে সময়তে ইণ্টাৰনেটৰ সেই নিযুত তথ্য উৎসৰ মাজত সকলোৰে আটাইতকৈ বিশ্বাসযোগ্য তথা নিৰ্ভৰযোগ্য উৎসটোৱেই হৈছে অনলাইন মুক্ত বিশ্বকোষ, 'ৱিকিপেডিয়া'।
 বিশ্বকোষ বুলি ক'লেই মনলৈ ভাহি আহে আলমাৰীৰ এটা খাপৰ সিংহভাগ আয়তন আগুৰা প্ৰকাণ্ড চেহেৰাৰ কিতাপৰ কথা-য'ত থূপ খাই থাকে সম্ভৱপৰ সকলো বিষয়ৰ বিশদ জ্ঞান। ঠিক তেনেদৰে এইখন অনলাইন বিশ্বকোষ,'ৱিকিপেডিয়া'ই সহায় নকৰা বা ৱিকিপেডিয়াৰ সহায় নোলোৱাকৈ থকা মানুহ তেনেই হাতৰ আঙুলিত লেখিব পৰা।

ৱেবছাইটটোৰ উন্মোচনৰ পাছতেই মনলে এটা কথাই বাৰে বাৰে ভুমুকি মাৰিছিল যে পৃথিৱীৰ সকলো মানুহে গম পাব পৰাকৈতো এটা ৱেবছাইট সজা হ'ল, কিন্তু বহুত বিদ্যালয় মহাবিদ্যালয়ৰ কথা জানিবৰ বাবে সকলোৰে ৱেবছাইটবোৰতো সকলোৱে নাজানে। কোনো এখন বিদ্যালয় বা মহাবিদ্যালয়ৰ কথা ইণ্টাৰনেটত সন্ধান কৰোঁতে বিদ্যালয়খনৰ ৱিকিপেডিয়াৰ পৃষ্ঠাটোৰ পৰাহে বিদ্যালয়খনৰ ৱেবছাইটৰ ঠিকনাটো আমি লাভ কৰোঁ। তাৰমানে এতিয়াও ইণ্টাৰনেটত প্ৰতিষ্ঠা কৰা কামটো সম্পূৰ্ণ হোৱা নাই। কিন্তু ৱিকিপেডিয়াত স্কুলৰ কথা 'আহিবলৈ' হ'লেতো তাৰ কাৰ্যালয়ৰ কোনো মানুহক ক'ব লাগিব নহ'লে তেওঁলোকৰ কোনোবা মানুহ আহি আমাৰ স্কুলখন চাই যাব লাগিব ছাগে! মহা মস্কিল কাম চোন? কিন্তু ইমানবোৰ প্ৰৱন্ধ যে থাকে, আনকি শেহতীয়াকৈ মুক্তি পাবলগীয়া চিনেমা এখনৰ কথাও ইমান সোনকালে পঢ়িবলৈ পোৱা যায়,কেনেকৈ আচলতে কামবোৰ হৈ থাকে? আৰু যিকোনো বিষয়ৰ প্ৰৱন্ধত, প্ৰিয় ব্যঞ্জন থকাৰ দিনা  ভাতৰ কাঁহীখনত একো বাকী নথকাকৈ চুঁচি মাজি খাই একো বাকী নৰখাৰ নিচিনাকৈ সেই বিষয়বস্তুৰ সকলোখিনি তথ্য যোগ কৰা থাকে। কোনো ব্যক্তিবিশেষৰ মৃত্যুৰ দিনাও ছেকেণ্ডতে মৃত্যুৰ তাৰিখ তেওঁৰ ৱিকিপেডিয়াৰ পৃষ্ঠাত দৃশ্যমান হয়, যিটো গ্ৰন্থাকাৰৰ বিশ্বকোষত অসম্ভৱ।

কামবোৰ কেনেদৰে হয় জানিবলৈ সমাধান বিচাৰি বিচাৰি খুচৰিবলৈ আৰম্ভ কৰোঁতেই গম পালোঁ মুক্ত বিশ্বকোষখন সকলোৱে সম্পাদনা কৰিব পৰা। অৰ্থাৎ এই কামবোৰৰ বাবে নিৰ্দিষ্ট এটা কাৰ্যালয় নহলেও হয়। নিৰ্দিষ্ট কিছুমান নীতি নিয়মৰ মাজেৰে বিষয়বস্তুৰ গুৰুত্ব থকা প্ৰৱন্ধ লিখিবলৈ আমি কাকো পাচিব নালাগে, প্ৰয়োজন মাথোঁ শুদ্ধ আৰু সঠিক তথ্যউৎসৰ। ৱিকিপেডিয়াৰ বিশ্বাসযোগ্যতাৰ বহুখিনি,  তথ্যৰ এই প্ৰসংগসূত্ৰ, উৎসৰ ওপৰত নিৰ্ভৰশীল। একো একোটা প্ৰৱন্ধ বিশ্বৰ বিভিন্ন ভাষাত উপলব্ধ হৈ থাকে। কিমান মানুহ এই কামটোত জড়িত হৈ আছে, সেই কথা নিজে ৱেবছাইটটো খুলি নাচালে অনুধাৱন কৰিবলৈ সমস্যা হোৱাটো নতুন কথা নহয়।

অসমীয়া ৱিকিপেডিয়াৰ কথাও সমসাময়িকভাৱে সেই সময়তে শুনা পাইছিলোঁ। নিজৰ ভাষা আৰু জাতিৰ উত্তৰোত্তৰৰ কাৰণে অহৰহ লাগি থাকিব খোজা এচাম প্ৰচাৰবিমুখ মানুহে ৱিকিপেডিয়াৰ অসমীয়া সংস্কৰণৰ গুৰি ধৰিছিল। ইতিমধ্যে অসমীয়া ইউনিক'ড টাইপিং কীবৰ্ড ব্যৱহাৰ কৰি ইণ্টাৰনেটত অসমীয়া লিখিব পৰা হৈছিলোঁ। গতিকে সময় নষ্ট নকৰি ব্যৱহাৰকাৰীৰ একাউণ্ট এটা খুলি লৈ স্কুলৰ কথা লিখিবলৈ বুলি বহিলোঁ। একাউণ্ট খোলোতে ইমেইলত ৱিকিপেডি্যাৰ কিছুমান লিংক লগতে আহিছিল। যেনে ৱিকিপেডিয়াত কেনেকৈ লিখিব লাগে, ৱিকিপেডিয়াত লিখাৰ নিয়ম কি, ৱিকিপেডিয়া কি নহয় , পঞ্চশীল নীতি, নতুন সদস্যই জানিবলগীয়া কথা ইত্যাদি। খৰধৰৰ কোবত সেইবোৰ পঢ়িবলৈ বাদ দি পোনছাটেই প্ৰৱন্ধ লিখিবলৈহে বহিলোঁ। তাতে স্কুলৰ কথা কেনেকৈ সোনকালে দি "ৱিকিপেডিয়াত আমাৰ স্কুলৰ কথা আহি গ'ল চা"  এইবুলি কোৱাৰ ধান্দাটোৱে বেছিকৈ ক্ৰিয়া কৰি আছিল ছাগৈ, গতিকে বস্তুবোৰ কিবা খেলিমেলি লাগিল, ফলস্বৰূপে মাত্ৰ নতুনকৈ বনোৱা ৱেবছাইটৰ ঠিকনাটো লিখাৰ পাছত কামটোৰ সামৰণি পৰিল।

প্ৰায় এবছৰ মানৰ মূৰত এনেয়ে এবাৰ গুগলত নিজৰ জন্মভূমিৰ বিষয়ে কিনো ওলায় বুলি চাওঁতে দেখোঁ, অৱস্থা তেনেই তথৈবচ। দুশাৰীমানৰ বাদে বিশেষ একো তথ্যই নাই। তেতিয়া পুনৰ সেই ৱিকিপেডিয়াত নিজে লিখিব পৰাৰ কথাটো মনলৈ আহিল। তাৰপাছৰে পৰাই ঠিক কৰি ল'লোঁ যিমানখিনি পৰা যায় অসমীয়া ৱিকিপেডিয়ালৈ অৱদান আগবঢ়াবলৈ চেষ্টা কৰিম লগতে ইংৰাজী ৱিকিপেডিয়াত নিজৰ ঠাইখন আৰু স্কুলখনৰ বিষয়ে সংযোগ কৰিম যাতে ইয়াৰ পাছত কোনোবাই সেই দুশাৰীমানকে পঢ়ি সন্তুষ্ট হ'বলগীয়া নহয়। এই কামটোৰ জৰিয়তে আজৰি সময়ৰ ভাল ব্যৱহাৰো হ'ব, ইণ্টাৰনেটৰ এনেই ব্যৱহাৰ নকৰি তাত কিবা এটা ভাল কাম কৰিছোঁ বুলি মনটোও ভাল লাগি থাকিব। গতিকে সাতে পাচে মই আকৌ এবাৰ কামটোত মনোযোগ দিবলৈ চেষ্টা চলালোঁ।

সেই এবাৰ কামটোত যেতিয়া লাগিবলৈ আৰম্ভ কৰিলোঁ, এক অদ্ভুত আসক্তিয়ে মোক জব্দ কৰি ল'লে। ৱিকিপেডিয়াত নতুনকৈ প্ৰৱন্ধ লিখাৰ আগেয়ে তাত আগৰে পৰা থকা প্ৰৱন্ধসমূহত সৰু-সুৰা সম্পাদনা কৰাৰ অভ্যাস কৰি লোৱা উচিত যাতে লিখাৰ ধৰণ(ষ্টাইল)ৰ এটা সম্যক ধাৰণা হয়। গতিকে মই তেনেকৈ পুৰণা প্ৰৱন্ধৰ দুটামান সৰু সুৰা বানানৰ শুধৰণি, থাকি যোৱা দাৰি কমাৰ শুধৰণি কৰি পুনৰবাৰ প্ৰৱন্ধ লিখাৰ কামটো আৰম্ভ কৰিলোঁ। এইবাৰ লিখাত মোৰ তেনেকৈ ইমান সমস্যাৰ সৃষ্টি নহ'ল, আৰু যিবোৰ ভুল হৈছিল,সেইবোৰ অসমীয়া ৱিকিপেডিয়াৰ সক্ৰিয় ব্যৱহাৰকাৰীসকলে (বা কৰ্মদল) শুধৰাই দিছিল। লাহে লাহে গম পালোঁ যে এই কামটো কৰি থকা মানুহবোৰৰ ভিতৰত মোতকৈ বয়সত সৰু বহুত সদস্যও আছে। কৌতূহলবশতঃ খুচৰি চাওঁতে দেখিলোঁ তেওঁলোকে লিখা ডেৰশতকৈও অধিক প্ৰৱন্ধসমূহৰ গুণগত মানদণ্ডও যথেষ্ট উচ্চখাপৰ। এই কথাটোৱে নতুন প্ৰৱন্ধ লিখাৰ ক্ষেত্ৰত যথেষ্ট অনুপ্ৰাণিত কৰাৰ লগতে উৎসাহ যোগালে।

নিজৰ ঠাইখনৰ কেইখনমান ঐতিহ্যমণ্ডিত বিদ্যালয়, মহাবিদ্যালয়ৰ আৰু ব্যক্তিৰ বিষয়ে লিখাৰ পাছত ইংৰাজী ৱিকিপেডিয়াৰ পৰা অনুবাদ কৰা কামটোত জড়িত হৈ পৰিলোঁ। মোৰ নিজৰ ভাল লগা বিষয়সমূহৰ বিষয়ে সংযোগ কৰাৰ পাছত লাহেকৈ পদাৰ্থ বিজ্ঞানৰ প্ৰৱন্ধসমূহ অনুবাদ কৰিবলৈ চেষ্টা কৰিছিলোঁ।  অনুবাদ কৰা কামটো নতুনকৈ কোনো এটা প্ৰৱন্ধ এটা লিখাৰ লগত প্ৰায় একেই, মাত্ৰ তাত তথ্যৰ উৎসসমূহ ইতিমধ্যেই গোটাই থোৱা থাকে। গতিকে সংযোগ কৰিবলগীয়া কথাটোৰ বাবে প্ৰমাণ বিচাৰি ঘুৰ্মুটিয়াই ফুৰিবলগীয়া নহয়। মাত্ৰ প্ৰয়োজন অনুবাদ কৰিবলৈ লোৱা বিষয়টোৰ ওপৰত সম্যক কিছু জ্ঞান।

ৱিকিপেডিয়াৰ কাৰণে কৰা মোৰ এই সামান্য অৱদানে অসমীয়া ভাষাটোৰ কাৰণে কিমান শতাংশ সহায় কৰিছে, সেই সম্পৰ্কে মই জ্ঞাত নহয়। কিন্তু এই কামটোৰ দ্বাৰা মোৰ নিজৰ যিমানখিনি সহায় হৈছে সেয়া মই  স্বীকাৰ কৰিবই লাগিব। বিভিন্ন বিষয়ৰ প্ৰৱন্ধ লিখাৰ অভ্যাসে সেইবোৰৰ সম্পৰ্কে ভালদৰে জানিবলৈ সুবিধা পোৱাৰ লগতে অনুবাদ কৰা কামটোৰ দ্বাৰা যথেষ্ট লাভৱান হ'ব পাৰি। বিদ্যালয় মহাবিদ্যালয়ৰ ছাত্ৰ-ছাত্ৰীসকলে এই কামটোত জড়িত হ'লে অসমীয়া ৱিকিপেডিয়াৰ বাবে সহায় হোৱাৰ লগতে তেওঁলোকৰ নিজৰে যথেষ্ট সহায় হ'ব। তদুপৰি,সবাতোকৈ ডাঙৰ কথা, এই ৱেবছাইটটো ছছিয়েল মিডিয়া ছাইটবোৰতকৈ বেছি আসক্তিযুক্ত আৰু পৃথক।

ভাৰতীয় ভাষাসমূহৰ ভিতৰত অসমীয়া ৱিকিপেডিয়াৰ সংস্কৰণৰ কাম ২০০২ চনত মালায়লম ভাষাৰ পাছতেই দ্বিতীয় ভাষা হিচাপে আৰম্ভ হৈছিল। বৰ্তমানে মালায়লম সংস্কৰণত ৫০ হাজাৰৰো অধিক প্ৰৱন্ধ থকাৰ বিপৰীতে অসমীয়া সংস্কৰণত আছে চাৰে চাৰি হাজাৰ। ইংৰাজী সংস্কৰণত আছে পাঁচ কোটিৰো অধিক। গতিকে আমাৰ ভাষাটোৰ বাবে কাম কৰিবলৈ মন থকাসকলৰ বাবে অসমীয়া ৱিকিপেডিয়াক আৰু তথ্যসমৃদ্ধ কৰি তোলা, প্ৰৱন্ধসমূহৰ মানদণ্ড উন্নত কৰা, নতুন প্ৰৱন্ধ সংযোগ কৰা ইত্যাদি হ'ব পাৰে তেওঁলোকে কৰিব পৰা কামৰ উদাহৰণ।  অসমৰ প্ৰত্যেকজন ইণ্টাৰনেট ব্যৱহাৰকাৰীয়ে নিজৰ পচন্দ অনুসাৰে এটাকৈ নতুন প্ৰৱন্ধও যদি অসমীয়া ৱিকিপেডিয়াত যোগ কৰে, ই হৈ পৰিব অসমীয়া ভাষাক বিশ্ব দৰবাৰলৈ লৈ যোৱাৰ ইতিহাসত এক সবল পদক্ষেপ।

পোনপ্ৰথমে কথাবোৰ ভালদৰে বুজি নলৈ আৰম্ভণি কৰাৰ বাবে বেয়া লাগিছিল। তাতে যিকোনো ভাল অভ্যাস গঢ় লৈ উঠিবলৈ ছাগৈ আৰম্ভণিতে তিতা-কেঁহা অলপ সহ্য কৰিলেহে পাছত কামটো কৰাৰ ৰস পাব পৰা যায়। সেই পাছৰ বাৰ  যেতিয়া প্ৰৱন্ধ লিখিবলৈ আৰম্ভ কৰি সোৱাদ পালোঁ, মই লাহে লাহে আৱিষ্কাৰ কৰিলোঁ যে এই কামটোৱে আমাৰ মনলৈ আনি দিব পাৰে অন্য এক অদ্ভূত প্ৰশান্তিৰ ভাৱ, নিজৰ ভাষা আৰু জাতিটোৰ প্ৰতি থকা তীব্ৰ চেতনাৰ নতুন জোকাৰণি আৰু জ্ঞানৰ স্ফূৰণ।





Popular posts from this blog

মাতৃভাষা আৰু আমাৰ দায়িত্ব

Photo Source:  www.bragitoff.com অসমীয়া ভাষাৰ ব্যৱহাৰ আৰু বিদ্যালয়ত অসমীয়া ভাষা শিক্ষণ মাধ্যম হোৱাৰ ক্ষেত্ৰত ইতিমধ্যে যথেষ্ট বাদানুবাদ আৰম্ভ হৈছে আৰু এই সন্দৰ্ভত সকলোৱে একমত হ ' ব পৰাকৈ যিকোনো এটা সিদ্ধান্ত এতিয়ালৈকে আৱিষ্কাৰ হোৱা নাই(হয়তু নহব) । অসমীয়া ভাষাৰ প্ৰচাৰ , ব্যৱহাৰ , অসমৰ শিক্ষাৰ মাধ্যম হিচাপে কেৱল অসমীয়া ভাষাৰ ব্যৱহাৰ কৰা আদিবোৰ সততে সংবাদ মাধ্যমৰ শীৰ্ষস্থান অধিকাৰ কৰা দেখিবলৈ পোৱা গৈছে।   প্ৰত্যেক বছৰে মেট্ৰিকৰ ফলাফল ঘোষণা কৰাৰ পাছত বাতৰিকাগজৰ শিৰোনামবোৰেও (উদাহৰণস্বৰূপে ব্যক্তিগত খণ্ডৰ ইংৰাজী মাধ্যমৰ জয়যাত্ৰা) এইক্ষেত্ৰত এক ভূমিকা বহন কৰা দেখা যায়। পোনপ্ৰথমে আমি ইংৰাজী ভাষাৰ আগ্ৰাসনৰ কথাকে যদি চাবলৈ যাওঁ , ইয়াৰ মূলতে হ ' ল ইংৰাজসকলৰ সমগ্ৰ বিশ্বত উপনিৱেশ স্থাপনৰ যি প্ৰক্ৰিয়া , তাৰ ফলত প্ৰায় সৰু বৰ সকলো দেশতে এই ভাষাৰ প্ৰচলন আৰু ফলাফলস্বৰূপে বিশ্বৰ প্ৰধান ভাষা হিচাপে এতিয়া ইংৰাজী ভাষাৰ সিংহাসন লাভ। প্ৰায়সংখ্যক দেশৰে প্ৰধান ভাষা( official language) হিচাপে ইংৰাজী ভাষা ব্যৱহাৰ হৈ আহিছে আৰু শেহতীয়া তথ্যমতে সমগ্ৰ বিশ্বৰ দুই মিলিয়ন লোকে তথ্যৰ আদান প্ৰদা

প্ৰিয়বন্ধু

Photo source: http://srzimmartist.blogspot.com (ৰচনাকালঃ ২০০৯) ঘণ্টাটো পৰাৰ লগে লগে গোটেই শ্ৰেণীটোৱেই প্ৰাণ পাই উঠিল। সকলোৱে চিঞৰ বাখৰ কৰি বাহিৰলৈ ওলাই গ'ল যদিও এজন তাৰ ব্যতিক্ৰম। ভালকৈ লক্ষ্য কৰিলে দেখা যায় যে দুচকুত অশ্ৰুৰ জিলিকণি, উদাস মুখৰ ভাও দি থকা এজন ল'ৰা। কিছুসময় পাছতঐ তালৈ এজাক ছোৱালীৰ আগমণ ঘটিল। সিহঁতৰ উশৃংখল হাঁহি, মন্তব্যবোৰে ল'ৰাটোৰ চকুপানীৰ নৈখন খৰস্ৰোতা হোৱাতহে সহায় কৰিলে। নাম তাৰ বৰুণ। শ্ৰেণীৰ আটাইতকৈ শান্ত ল'ৰা। শান্ত মানে একেবাৰে মুখৰ পৰা মাত নোলায়েই। কিন্তু তাৰ মনটো বৰ বহল। শ্ৰেণীৰ সকলো শিক্ষকৰে প্ৰিয়পাত্ৰ সি। তাৰ নম্ৰ, ভদ্ৰ আচৰণে তাক বিপদত নেপেলোৱাও নহয়। বিশেষকৈ, শ্ৰেণীৰ উৎপতীয়া কেইবাটাও ল'ৰাই তাৰ চৰিত্ৰ নষ্ট কৰাৰ চেষ্টা চলায়েই থাকে। কিন্তু তৰোৱালতকৈ কলম সদায় শক্তিশালী। তাৰ চৰিত্ৰ নামে বগা কাজগখিলাত সি ধূলিকণা এটাও পৰিবলৈ নিদিয়ে। শ্ৰেণীত তাৰ স্থান চতুৰ্থ। স্থানক লৈ সি কোনোদিনে গৰ্ব কৰা নাই আৰু তাক দেখিলে এনে লাগে যেন সি সেয়া কৰাৰ প্ৰয়োজনবোধো কৰা নাই। সময়মতে স্কুললৈ আহি শিক্ষকৰ নিৰ্দেশানুসৰি নিয়মমাফিক কৰ্ত্তব্যসমাপন কৰি সি

আকাশবাণী

     সৰুতে ৰাতিপুৱা শুই উঠাৰ পৰা ৰাতি ভাত খোৱাৰ পৰলৈকে যদি কিবা এটা বস্তু একেৰাহে আমাৰ লগত লাগিয়ে থাকে বুলি কবলৈ যাওঁ , নিশ্চয়কৈ তাৰ ভিতৰত ৰেডিঅ ' ৰ নামটোও সংলগ্ন কৰিব লাগিব। আজিকালিৰ ছাত্ৰ-ছাত্ৰীসকলৰ কথা নাজানো , কিন্তু মই হোষ্টেল অহাৰ আগলৈকে নিয়মীয়াকৈ ৰেডিঅ ' ৰ অনুষ্ঠান উপভোগ কৰিছিলোঁ। প্ৰকৃততে ৰেডিঅ ' শুনাটো একপ্ৰকাৰৰ বাকীবোৰ দৈনন্দিন কামৰ দৰেই আছিল। আমাৰ অঞ্চলত গুৱাহাটী আকাশবাণী কেন্দ্ৰৰ অনুষ্ঠানসমূহ সম্প্ৰচাৰিত হোৱাত অসুবিধা হৈছিল(দূৰত্বৰ বাবে) আৰু আমাৰ ৰাতিপুৱাবোৰ আৰম্ভ হৈছিল ডিব্ৰুগড় আকাশবাণী কেন্দ্ৰৰ পৰা সম্প্ৰচাৰিত ৰাতিপুৱাৰ অনুষ্ঠানসমূহৰ জৰিয়তে। এক বিশেষ সুৰ ধ্বনিৰ জৰিয়তে কেন্দ্ৰৰ প্ৰত্যেকখন অধিৱেশন আৰম্ভ হৈছিল।

মোৰ নৱছাত্ৰাবাস

“ মই অহাৰ লগে লগে সাউতকৈ উঠি গৈ ফুল ছাৰ্টটো পিন্ধিলি যে ? হা ? গৰম উঠা নাই নেকি ?” “ ছাৰ হ ’ ব , একো নহয় । ইমান গৰমো   উঠা নাই ” “ অ , হ ’ ব বাৰু । ইয়াত থাকি পঢ়া শুনা কৰিবলে খালি নেপাহৰিবি । ঢকুৱাখনাৰ পৰা পঢ়িবলে আহিছ , পঢ়িবি , কিবা অসুবিধা পালে মোক কবি , ৰাকেশ পৰাণক কবি ” । ৰাকেশ পৰাণ মানে হোষ্টেলৰ সেইসময়ৰ মণিটৰ ৰাকেশদা আৰু পৰাণদা । ৰাকেশদা মোৰ ৰুমমেটো আছিল । নিজৰ কোঠাৰ পৰা বাহিৰলে ওলালেই তথা ৰূমলে কোনোবা ছিনিয়ৰ আহিলে যাতে আমাক ফুলছাৰ্ট আৰু লংপেণ্ট পিন্ধা দেখা পায় , তেনেকুৱা এটা কটকটীয়া নিয়মে আমাক সকলোক বান্ধি থৈছিল । জুন মাহৰ শেষ দিন । ইমান সময়ে যেনতেন সহ্য কৰি অধীক্ষক ড০ বিমান চেতিয়া ছাৰে কথাখিনি কৈ মোৰ ৰুমৰ দুৱাৰখন পাৰ হোৱাৰ লগে লগেই ছাৰ্টটো খুলি পেলাই ফেনৰ তলত বহি পৰিলোঁ ।

অসমীয়া ভূচিত্ৰাৱলী

---চন্দ্ৰমা দুৱৰী বৰগোহাঞি--- ২০১৮ চনৰ ৪ ফেব্ৰুৱাৰীৰ দেওবৰীয়া বিচিত্ৰাত ৰবেন্দ্ৰ কুমাৰ দাসদেৱৰ ভূচিত্ৰাৱলীৰ বৰ্ণনাই আমাকো লৈ গ'ল দূৰ অতীতৰ তৃতীয় চতুৰ্থ পঞ্চম শ্ৰেণীত অঁকা আমাৰ চিৰচেনেহী জন্মভূমি অসমৰ মানচিত্ৰখনলৈ। ১৯৬৭ চনত যেতিয়া ৩য় শ্ৰেণীৰ বৃত্তি পৰীক্ষা দিবলৈ বাচনিভুক্ত হলো, ভূগোল বিষয়ত নিজ জিলাৰ এখন মেপ আঁকি জিলাৰ সদৰ ঠাই, নদী আদি বহুৱাবলৈ আহিছিল। তাৰ পাছত অসমৰ মেপ খন আকিবলৈ আমাক শ্ৰ্দ্ধাৰ গগন চেতিয়া ছাৰে শিকাইছিল। দাসদেৱে কোৱাৰ দৰে প্ৰথমে মেপখনৰ চাৰিসীমা জুখি স্কেলৰ সহায়ত সমান সমান জোখত বৰ্গক্ষেত্ৰ  আঁচ দি মেপখন আঁকিবলৈ শিকাইছিল। তাৰপাছত জিলাৰ সদৰ ঠাই, তেলৰ পুঙ থকা ঠাই, নদী আদি বহুৱাবলৈ দেখুৱাই দিয়ে। বিদ্যালয়ত থকা অসমীয়া ভূচিত্ৰাৱলীখনৰ পৰা ছাৰে মেপত থকা জিলাৰ সদৰ ঠাই, উত্তৰবাহিনী-দক্ষিণবাহিনী নদীবোৰ, তেল শোধনাগাৰ থকা ঠাইৰ নামসমূহ লিখি মেপত বহুৱাই আনিবলৈ দিয়ে। ঘৰত আহি ককাইদেউহঁতক খাটনি ধৰোঁ ভূচিত্ৰাৱলী এখন লাগে নিজাকৈ। ককাইদেউ বাইদেউহঁতৰ ভূচিত্ৰাৱলী বিলাক সিহঁতক দৰকাৰ হোৱাৰ বাবে দেউতাই নতুনকৈ মোক এখন ভূচিত্ৰাৱলী কিনি দিছিল। বিদ্যালয়লৈ আনিলে ভূগোল পিৰিয়ডত আটাইয়ে লগ হৈ ভূ

প্ৰতিধ্বনি

পল্লৱীয়ে যদি আগতে স্কুললৈ যোৱাৰ আগতে মাকক কয় , মই বইল কৰা কণী খাবলৈ বেয়া পাওঁ , মোক ভাজি দে , মাকে ক ’ ব বায়েৰে দেখোন একোতে অজুহাত দেখুৱাই নেপায় , তইনো কেনেকৈ ইমান আলসুৱা স্বভাৱৰ হলি । আৰু তাৰ পাছত তাই বইল কৰা কণীটো খঙতে নি পকা মজিয়াত পেলাই দিলে কণীটো খাব পৰাও হৈ থাকে , মজিয়াখনো নাভাঙে আৰু অৱশেষত গৈ তাই ভাজি কৰা কণীও খাবলৈ নাপায় । পাছত বায়েক বসুন্ধৰাই নিজৰ ভাগৰটো তাইক দি দিয়ে আৰু তাই মজিয়াত পৰাটো খায় । কলেজ পোৱাৰ পাছত বজাৰলৈ অথবা ক ’ ৰবালৈ ওলাই যাবলৈ হ ’ লে মাকক নিবলৈ দেউতাকৰ স্কুটিখন কোনে চলাব ? পল্লৱীয়ে কেইবাদিনো মুখ ওন্দোলাই , পিন্ধিবলৈ বুলি আনি লোৱা চেণ্ডেল দলিয়াই মেলি চালে , কিন্তু মাক সদায় ডাঙৰ জীয়েক বসুন্ধৰাৰ লগতহে যাব । স্কুটি চলাব পাৰিলে বুলিয়ে কি হ ’ ল ? পল্লৱী সৰু ছোৱালী । বইল কৰা কণী খালে যে তেলত ভজাতকৈ বেছি শক্তি পোৱা যায় , সেয়া বুজি নোপোৱা সৰু ছোৱালী । বসুন্ধৰাই সেইবোৰ বুজি নাপায় । তাইৰ দীঘল চুলিকোছা দুডাল বেণী কৰি মাকে আঁচুৰি দিয়ে , তাই মাকৰ চৰণ চুই স্কুললৈ যায় । কলেজত নামভৰ্ত্তি কৰাৰ পিছত তাই বেণী গুঠিবলৈ এৰিলে , চুলিকোছা আৰু অলপ দীঘল হ ’ ল । তাইৰ

দ্য নিউ গাৰ্ল ইন দ্য চিটী

---প্ৰিয়ম দি জ্যোৎস্না---  (১)  "হাজাৰজনৰ দৰে ময়ো যেতিয়া মুম্বাইলৈ আহিছিলোঁ, তেতিয়া নিজৰ বয়-বস্তুবোৰৰ সৈতে কিছুমান সপোনো বান্ধি আনিছিলো। তাৰ ভিতৰত আটাইতকৈ ডাঙৰ সপোনটো আছিল--এগৰাকী লেখক হোৱাৰ সপোন। যেতিয়া মোক এই প্ৰৱন্ধটো লিখিবলৈ কোৱা হৈছিল, তেতিয়াই হয়তো মোৰ সপোনটো বাস্তৱলৈ ৰূপান্তৰিত হ'ল। কিন্তু অশেষ চেষ্টাৰ পিছতো মই এই প্ৰৱন্ধটো লিখিবলৈ পৰা নাছিলোঁ। প্ৰতিবাৰেই লিখিবলৈ লওঁতে এনেকুৱা লাগিছিল যেন বহু কথা থাকি গৈছে। এই চহৰখনৰ বিষয়ে এনেকুৱা কি ক'ম যি আজিলৈকে কোনেও কোৱা নাই! সেইকাৰণে জমা দিয়াৰ এৰাতিৰ আগত প্ৰৱন্ধটো মই ফালি পেলালো আৰু পুনৰ লিখিবলৈ আৰম্ভ কৰিলো।       কেৱল দুমাহতে এক অদ্ভুতধৰণৰ প্ৰেম হৈ গ'ল এই চহৰখনৰ সৈতে। চহৰখন মোৰ আপোন যেন লগা হ'ল। ইয়াৰ কাৰণ কি হ'ব পাৰে? মোৰ নতুন উৎসাহমূলক চাকৰিটো ,মোৰ সৰু ফ্লেটটো নে মোৰ স্বাধীনতা? এই চহৰখনে এনেকুৱা কি দিছে মোক , যি মোৰ আপোন হৈ পৰিছে? প্ৰকৃততে উত্তৰটো বহুদিন ধৰি মোৰ চকুৰ সন্মুখতে আছিল, কিন্তু মইহে ধৰিব পৰা নাছিলোঁ। মুম্বাইলৈ আহিয়েই প্ৰথম ৰাতি মই কাৰোবাক লগ পালো। এজন ল'ৰাক। বন্ধু, ৰূ

হৰ্ষাভোগলে অথবা ছেহৱাগহঁতৰ কথাৰে….

--- সুমন্ত সৌৰভ কাকতি --- অন্য জনপ্ৰিয় খেলতকৈ ক্ৰিকেট সময়ৰ দিশৰ পৰা কিছু দীঘলীয়া খেল , ছয়-চাৰি বা উইকেইৰ সঘন পতন নঘটিলে ক্ৰিকেট সাধাৰণতে বিৰক্তিকৰ আৰু আমনিদায়ক হৈ উঠে , কিন্ত সেইসময়তে পোনপটীয়া সম্প্ৰচাৰৰ হিন্দী ভাষাৰ কমেণ্ট্ৰি বস্কৰ মাইক্ৰফোণত বাজি উঠা ” চিপছ কা পেকেট অঔৰ ৰবীন্দ্ৰ জাডেজা কা অভাৰ কব খতম হো জ্যায়ে পতা নহী চলতা” “প্যায়াৰ মে ডুবা হুৱা লড়কা , চায় মে ডুবা হুৱা বিস্কুট অঔৰ বিনা ৰাণ কে বেটছমেন কিছি কাম কা নহী ” বা “ইয়ে ইতনা আছান কেটচ থা কি শ্বোলে কা ঠাকুৰ ভি ইছে পকড় চকতা থা ” ( শ্বোলে চিনেমাৰ ঠাকুৰৰ দুয়োখন হাতেই নাছিল ) ,”পাকিস্থান কো গোলী চে নহী কোহলী চে ডৰ লগতা হ্যায় ” খঙাল বিৰাট কোহলিৰ চমৎকাৰ প্ৰদৰ্শনত সন্মোহিত হৈ কোৱা ” বিৰাট কা তেৱৰ মানো সোণে কা জেবৰ ( অলংকাৰ) “ফটে কলাৰ অঔৰ পিতে হুৱে বলাৰ কো ক্যোয়ী ইজ্জত নহী দেতা ” বা চেতেশ্বৰ পূজাৰাক দীৰ্ঘসময় ক্ৰীজত অতিবাহিত কৰাৰ বাবে উদ্দেশ্যি কোৱা” ইয়ে জীয়েন্দী না মিলেগী পূজাৰা ” ইত্যাদি অনেক ধৰণৰ খুহুতীয়া আমোদজনক ওৱান লাইনাৰ বোৰে বিৰক্তিকৰ খেল এখনতো দৰ্শকক আনন্দ দিয়াৰ লগতে মনোযোগ পুনৰবাৰ আকৰ্ষণ কৰিবলৈ সক্ষম হয় । আৰম্ভণিৰ অভাৰট

ইত্যাদি

(ৰচনাকালঃ ২০ ১১ ) বহুদিনৰ মূৰত মোৰ বাবে এটা আবেলি সম্পূৰ্ণ একান্ত ব্যক্তিগতভাৱে ওলাই পৰিল। স্কুলীয়া জীৱনৰ শেষ পৰীক্ষাটো দি উঠাৰ পাছত প্ৰকৃততে সকলোৰে ক’ত যাম, ক’ত নাযাম লাগে নেকি! মোৰো কাৰ্যতঃ একেই হৈছে। কি কৰোঁ কি নকৰোৰ উত্তেজনাত আৰু ঘৰৰ প্ৰৰোচনাত কেইদিনমানৰ বাবে খুড়াহঁতৰ ঘৰতে থাকি আহিলোগৈ। এতিয়া সেয়েহে বহুদিনৰ পিছত, বিহুৰ সময়তহে আজৰি হৈছোঁ আৰু সেই বাবে লগে লগেই মনজিতহঁতৰ ওচৰলৈ ঢাপলি মেলি আহিছোঁ। বিহুৰ সময়। এইকেইদিন গাঁৱত নাথাকিলো বুলিয়েই ইমান পৰিৱৰ্তননো হ’ব পাৰেনে? মহেন্দ্ৰ খুড়াৰ ঘৰৰ আগৰ গছ দুজোপাৰ ওপৰৰ ডাল-পাত কাটি দি গোটেইখন মুকলি কৰি ল’লে, ডিম্পলহঁতৰ আধৰুৱা পকাঘৰটো এতিয়া ৰং দিছে, কণহঁতৰ ঘৰৰ ওচৰতে এটা ডাঙৰ মাছ পুহিবৰ বাবে পুখুৰী খান্দিছে আৰু গাঁৱৰ ৰাস্তাটোতে এটা কালভাৰ্ট নিৰ্মাণ হৈ আছিল, সেইটো সম্পূৰ্ণ হৈ উঠিছে। মুঠতে এক বিৰাট পৰিৱৰ্তন। লাহে লাহে মই ৰাণাহঁতৰ ঘৰ পালোগৈ। আগফালে তাৰ ভনীয়েকে খেলি থকাৰ পৰাই মাত লগালে যে সি ইতিমধ্যেই ঘৰৰ পৰা অন্তৰ্ধান হৈছে। এইবাৰ আৰু মই পোনে পোনে পথাৰ পালোগৈ। কিন্তু মোৰ দুৰ্ভাগ্য যে খেল ইতিমধ্যেই আৰম্ভ হৈ গ’ল আৰু খেলৰ মাজত নতুনকৈ সোমাই খেলি

মাজ ৰাতি কেতেকী (Not a film review)

মাজ ৰাতি কেতেকী বোলছবিখন চালোঁ। প্ৰথমবাৰ, যেতিয়া তেজপুৰৰ পৰা ঘৰলৈ বুলি বাছত আহি আছিলোঁ, তেতিয়া। ঘৰৰ পৰা গুৱাহাটীলৈ যাবলৈ ভাল, এটা নিশাৰ বাট। লখিমপুৰ যাবলৈও ভাল, ডেৰঘণ্টা সময়ৰ প্ৰয়োজন। কিন্তু তেজপুৰলৈ যাবলৈ আমুৱাই যায়। দিনৰ ভাগত যাবলৈ হ’লে ৰাতিপুৱাই ওলাব লাগে, তেজপুৰ পায়গৈ প্ৰায় আঢ়ৈৰ পৰা তিনি বজাৰ ভিতৰত। গৰম দিন হ’লে সহ্যৰ সীমা কেতিয়াবাই পাৰ হৈ যায়। তাতে যদি বাছত মানুহ উঠাবলৈ পদূলিয়ে পদূলিয়ে ৰখায়, তেতিয়া কি কৰোঁ কি নকৰোঁ যেন হয়। এয়া কেৱল মোৰ অভিজ্ঞতাই নহয়, ভূক্তভোগী বহুত। অৱশ্যে ৰেলগাড়ীত যাব পাৰি, বাছযাত্ৰাতকৈ আৰামী হোৱাৰ লগতে ইমান আমনি নালাগে। কিন্তু তাতো মানুহৰ যি ভীৰ, যি হেঁচা ঠেলা, তাৰ ওপৰত আকৌ অপৰিষ্কাৰ পৰিৱেশ আৰু বেগৰ বস্তু চুৰি হোৱাৰ ভয়। গতিকে একেলগে কেইবাটাও গ’লে ৰে’লত যোৱাই ঠিক। সেইদিনা অকলেই তেজপুৰৰ পৰা বাছত আহিবলগীয়া হ’ল, গতিকে চিনেমাখন ওলিয়াই ল’লোঁ।